କୋଟିଆରେ ଓଡ଼ିଶା-ଆନ୍ଧ୍ର ପୋଲିସ ମୁହାଁମୁହିଁ: ବ୍ୟାରିକେଡ୍ ହଟାଇବାକୁ ନେଇ ସୀମାରେ ତୀବ୍ର ଉତ୍ତେଜନା
କୋରାପୁଟ: କୋଟିଆରେ ଓଡ଼ିଶା ପୋଲିସ ସହ ଆନ୍ଧ୍ର ପୋଲିସ ମୁହାଁମୁହିଁ । ବ୍ୟାରିକେଡ୍ ହଟାଇବାକୁ ନେଇ ଓଡ଼ିଶା ଓ ଆନ୍ଧ୍ରପ୍ରଦେଶ ସୀମାନ୍ତରେ ଥିବା କୋରାପୁଟ ଜିଲ୍ଲାର କୋଟିଆ ଅଞ୍ଚଳରେ ପୁଣି ଥରେ ଉତ୍ତେଜନା ଦେଖାଦେଇଛି। କୋରାପୁଟ ଜିଲ୍ଲା ନେରେଡିବାଲସା ଗ୍ରାମ ନିକଟରେ ଥିବା ଏକ ଚେକ୍ପୋଷ୍ଟରେ ଓଡ଼ିଶା ପୋଲିସ ପକ୍ଷରୁ ଲଗାଯାଇଥିବା ବ୍ୟାରିକେଡ୍କୁ ଆନ୍ଧ୍ର ପୋଲିସ ହଟାଇବାକୁ ନେଇ ଦୁଇ ରାଜ୍ୟର ପୋଲିସ ବାହିନୀ ମୁହାଁମୁହିଁ ହୋଇଥିବା ଖବର ମିଳିଛି।
ସୂଚନା ଅନୁସାରେ, କୋଟିଆ ଅଞ୍ଚଳରେ ଆନ୍ଧ୍ରପ୍ରଦେଶର ନିର୍ବାଚନ ସମ୍ବନ୍ଧୀୟ କାର୍ଯ୍ୟକଳାପକୁ ଦୃଷ୍ଟିରେ ରଖି ଶାନ୍ତିଶୃଙ୍ଖଳା ରକ୍ଷା ପାଇଁ ଓଡ଼ିଶା ପୋଲିସ ପକ୍ଷରୁ ସେଠାରେ ବ୍ୟାରିକେଡ୍ ନିର୍ମାଣ କରାଯାଇଥିଲା। ତେବେ ମଙ୍ଗଳବାର ଆନ୍ଧ୍ରପ୍ରଦେଶ ପୋଲିସର କିଛି କର୍ମଚାରୀ ସେହି ବ୍ୟାରିକେଡ୍କୁ ଜବରଦସ୍ତି ବାହାର କରିବାକୁ ଚେଷ୍ଟା କରିଥିଲେ। ଏହାକୁ ଓଡ଼ିଶା ପୋଲିସ ପକ୍ଷରୁ ବିରୋଧ କରାଯିବାରୁ ଉଭୟ ପକ୍ଷ ମଧ୍ୟରେ ପ୍ରବଳ ଯୁକ୍ତିତର୍କ ହୋଇଥିଲା।
ଘଟଣା ସେତିକିରେ ସୀମିତ ନରହି ସେଠାରେ ଉପସ୍ଥିତ ଥିବା କୋରାପୁଟ ଉପ-ଜିଲ୍ଲାପାଳ ଏବଂ ପଟ୍ଟାଙ୍ଗୀ ତହସିଲଦାରଙ୍କ ସହ ମଧ୍ୟ ଆନ୍ଧ୍ର ପୋଲିସ ଅତି ଅସୌଜନ୍ୟମୂଳକ ଆଚରଣ କରିଥିବା ଅଭିଯୋଗ ହୋଇଛି। ପ୍ରଶାସନିକ ଅଧିକାରୀମାନେ ବୁଝାଇବାକୁ ଚେଷ୍ଟା କରିଥିଲେ ମଧ୍ୟ ଆନ୍ଧ୍ର ପୋଲିସ ସେମାନଙ୍କ ସହ ଖରାପ ବାକ୍ୟ ବିନିମୟ କରିଥିଲା, ଯାହା ଫଳରେ ସୀମାନ୍ତରେ ସ୍ଥିତି ଗମ୍ଭୀର ହୋଇପଡିଥିଲା।
