ଦୀପାବଳିରେ ୬.୫ କିଲୋ ସୁନା ଓ ୩୮୦ କ୍ୟାରେଟ୍ ହୀରାରେ ତିଆରି ହେଲା କୋଟି କୋଟି ଟଙ୍କାର ଭବ୍ୟ ରଙ୍ଗୋଲି
ନୂଆଦିଲ୍ଲୀ: ସାଧାରଣତଃ ଦୀପାବଳିରେ ଆମେ ଘର ଆଗରେ ରଙ୍ଗ ବା ଫୁଲରେ ରଙ୍ଗୋଲି ତିଆରି କରିଥାଉ। କିନ୍ତୁ ବିଶ୍ୱର ସବୁଠାରୁ ବିଳାସପୂର୍ଣ୍ଣ ସହର ଭାବେ ଜଣାଶୁଣା ଦୁବାଇ ଏହି ପରମ୍ପରାକୁ ଏକ ନୂଆ ରୂପ ଦେଇଛି। ଦୁବାଇର ଏକ ପ୍ରସିଦ୍ଧ ମଲ୍ରେ ଏଭଳି ଏକ ରଙ୍ଗୋଲି ପ୍ରଦର୍ଶିତ ହୋଇଛି, ଯାହା କୌଣସି ରଙ୍ଗରେ ନୁହେଁ ବରଂ କିଲୋ କିଲୋ ସୁନା ଏବଂ ଶହ ଶହ ହୀରାରେ ନିର୍ମିତ। ଏହି ଭବ୍ୟ କଳାକୃତିର ଭିଡିଓ ଏବେ ସୋସିଆଲ ମିଡିଆରେ ବେଶ୍ ଭାଇରାଲ ହେବାରେ ଲାଗିଛି।
ଦୁବାଇର ସିଟି ସେଣ୍ଟର ଦେଇରା (City Centre Deira) ମଲ୍ରେ ଏହି ଅଦ୍ଭୁତ ରଙ୍ଗୋଲି ସ୍ଥାପନ କରାଯାଇଛି। ଏଥିରେ ପ୍ରାୟ ୨୧୩ଟି ଅଳଙ୍କାର ବ୍ୟବହାର କରାଯାଇଛି, ଯାହାର ମୋଟ ଓଜନ ୬.୫ କିଲୋ ସୁନା ଏବଂ ଏଥିରେ ୩୮୦ କ୍ୟାରେଟର ହୀରା ଖଞ୍ଜା ଯାଇଛି। ବିଭିନ୍ନ ପ୍ରକାରର ହାର, ଚୁଡ଼ି, କାନଫୁଲ ଏବଂ ପେଣ୍ଡାଣ୍ଟକୁ ଅତି ସୂକ୍ଷ୍ମ ଭାବେ ସଜାଯାଇ ଏହି ପାରମ୍ପରିକ ରଙ୍ଗୋଲି ଡିଜାଇନ ପ୍ରସ୍ତୁତ କରାଯାଇଛି।
ଏହି ଦାମୀ ରଙ୍ଗୋଲିଟିକୁ ପ୍ରସ୍ତୁତ କରିବା ସହଜ ନଥିଲା। ଜୁଏଲାରୀ ବ୍ରାଣ୍ଡ ‘ଡାମାସ୍’ (Damas) ଏବଂ ଦୁବାଇ ଫେଷ୍ଟିଭାଲ ଆଣ୍ଡ ରିଟେଲ ଏଷ୍ଟାବ୍ଲିସମେଣ୍ଟର ମିଳିତ ସହଯୋଗରେ ଏହାକୁ ନିର୍ମାଣ କରାଯାଇଛି। ରିପୋର୍ଟ ଅନୁଯାୟୀ, ୧୦ ଜଣ ଦକ୍ଷ କାରିଗର ଦୀର୍ଘ ୧୬ ଘଣ୍ଟା ଧରି ନିରନ୍ତର ପରିଶ୍ରମ କରି ଏହି ସୁନା ଓ ହୀରାର ଅଳଙ୍କାରଗୁଡ଼ିକୁ ରଙ୍ଗୋଲିର ରୂପ ଦେଇଥିଲେ।
ଏହି ଆଖିଦୃଶିଆ ପ୍ରଦର୍ଶନୀକୁ ଆହୁରି ଗ୍ଲାମରସ୍ କରିଥିଲେ ବଲିଉଡ ଅଭିନେତ୍ରୀ ତମନ୍ନା ଭାଟିଆ। ସେ ନିଜେ ଉପସ୍ଥିତ ରହି ଏହି ସୁବର୍ଣ୍ଣ ରଙ୍ଗୋଲିକୁ ଉନ୍ମୋଚନ କରିଥିଲେ। ଭାରତୀୟ ମୁଦ୍ରାରେ ଏହି ରଙ୍ଗୋଲିର ଆନୁମାନିକ ମୂଲ୍ୟ ପ୍ରାୟ ୯ କୋଟି ଟଙ୍କା ବୋଲି କୁହାଯାଉଛି। ଯଦିଓ ଏହାର ସଠିକ୍ ମୂଲ୍ୟ ସମ୍ପର୍କରେ କୌଣସି ସରକାରୀ ଘୋଷଣା ହୋଇନାହିଁ, ତଥାପି ସୁନା ଓ ହୀରାର ବଜାର ମୂଲ୍ୟକୁ ଆଧାର କରି ଏହି ଆକଳନ କରାଯାଇଛି।
ଏହି ଭିଡିଓ ସାମ୍ନାକୁ ଆସିବା ପରେ ଲୋକେ ଦୁବାଇର ଏହି ବିଳାସପୂର୍ଣ୍ଣ ଶୈଳୀକୁ ଦେଖି ଆଶ୍ଚର୍ଯ୍ୟ ହୋଇଯାଇଛନ୍ତି। ସାଧାରଣ ରଙ୍ଗୋଲି ଉପରେ କେହି ପାଦ ଦେଇଦେବେ ବୋଲି ଆମେ ଚିନ୍ତିତ ଥାଉ, କିନ୍ତୁ ସୁନା-ହୀରାର ରଙ୍ଗୋଲିକୁ ସୁରକ୍ଷିତ ରଖିବା ନିଶ୍ଚିତ ଭାବେ ଏକ ବଡ଼ ଚ୍ୟାଲେଞ୍ଜ।
