‘ଗାଁରୁ ସୁଦୂର ବାଲି’: ବିଶ୍ୱ ଦରବାରରେ ଓଡ଼ିଶାର ତିନି ମିଶନ ଶକ୍ତି ମହିଳାଙ୍କ ସଫଳତା କାହାଣୀ

ଭୁବନେଶ୍ୱର: ଓଡ଼ିଶାର ଗାଁ ଗହଳିରୁ ବାହାରି ଏବେ ଇଣ୍ଡୋନେସିଆର ବାଲିରେ ନିଜର ପରାକାଷ୍ଠା ଦେଖାଇବେ ରାଜ୍ୟର ତିନିଜଣ ସଫଳ ମହିଳା ଉଦ୍ୟୋଗୀ। ଓଡ଼ିଶାର ପାରମ୍ପରିକ କଳାର ସଂରକ୍ଷଣ ସହ ଏହାକୁ ବିଶ୍ୱ ବଜାରରେ ପହଞ୍ଚାଇଥିବା ଏହି ତିନି ମହିଳା ଆସନ୍ତା ନଭେମ୍ବର ୨୪ ଓ ୨୫ ତାରିଖରେ ବାଲିରେ ଅନୁଷ୍ଠିତ ହେବାକୁ ଥିବା ‘ଓଡ଼ିଶା ପର୍ବ’ରେ ଓଡ଼ିଶାର ପ୍ରତିନିଧିତ୍ୱ କରିବେ। ପୁରୀର ସଞ୍ଜୁ ସ୍ୱାଇଁ, କୋରାପୁଟର କୋମଳ କୁମାରୀ ଏବଂ ମୟୂରଭଞ୍ଜର ସୁମିତ୍ରା ବାରିକ ମିଶନ ଶକ୍ତି ସ୍ୱୟଂ ସହାୟକ ଗୋଷ୍ଠୀ (SHG) ମାଧ୍ୟମରେ କିପରି ସ୍ଥାନୀୟ ସମ୍ବଳକୁ ନେଇ ସଫଳ ବ୍ୟବସାୟ କରିହୁଏ, ତାହାର ଉଦାହରଣ ସାଜିଛନ୍ତି।

ପୁରୀର ପଟ୍ଟଚିତ୍ର ନେଇ ବାଲି ଯିବେ ସଞ୍ଜୁ ସ୍ୱାଇଁ
ପୁରୀ ଜିଲ୍ଲା ରଘୁରାଜପୁରର ସଞ୍ଜୁ ସ୍ୱାଇଁ ପାରମ୍ପରିକ ପଟ୍ଟଚିତ୍ର କଳାକୁ ଡିଜିଟାଲ ପ୍ଲାଟଫର୍ମ ମାଧ୍ୟମରେ ନୂଆ ରୂପ ଦେଇଛନ୍ତି। ୨୦୧୦ ମସିହାରେ ୧୦ ଜଣ ସଦସ୍ୟାଙ୍କୁ ନେଇ ଗଠିତ ‘ଓମ୍ ସ୍ୱୟଂ ସହାୟକ ଗୋଷ୍ଠୀ’ର ସେ ସଭାପତି ଅଛନ୍ତି। ମିଶନ ଶକ୍ତି ମାଧ୍ୟମରେ ଆର୍ଥିକ ସହାୟତା ପାଇ ସେ ରିଲାଏନ୍ସ ଏବଂ ‘କଳା ସମ୍ପତ୍ତି’ ପରି ବଡ଼ ବଡ଼ ସଂସ୍ଥା ସହ ବଜାର ସଂଯୋଗ ସ୍ଥାପନ କରିଛନ୍ତି। ସେ ନିଜର କାରୁକାର୍ଯ୍ୟକୁ ଅନ୍ତର୍ଜାତୀୟ ଗ୍ରାହକଙ୍କ ପାଖରେ ପହଞ୍ଚାଇବାରେ ସଫଳ ହୋଇଛନ୍ତି।

‘ଲକ୍ଷପତି ଦିଦି’ କୋମଳ କୁମାରୀଙ୍କ ସଫଳତା
କୋରାପୁଟ ଜିଲ୍ଲା କୋଟପାଡ଼ ବ୍ଲକର କୋମଳ କୁମାରୀ ଜଣେ ସାଧାରଣ ଗୃହିଣୀରୁ ‘ଲକ୍ଷପତି ଦିଦି’ ହେବାର ଗୌରବ ଅର୍ଜନ କରିଛନ୍ତି। ‘ମା’ ତାରା ତାରିଣୀ ସ୍ୱୟଂ ସହାୟକ ଗୋଷ୍ଠୀ’ର ସଦସ୍ୟା ଭାବେ ସେ କୁକୁଡ଼ା ପାଳନରୁ ବ୍ୟବସାୟ ଆରମ୍ଭ କରି ଏବେ ଛତୁ ଚାଷ, ସାନିଟାରୀ ପ୍ୟାଡ୍ ନିର୍ମାଣ ଏବଂ କଳା ହଳଦୀ ଚାଷ ପର୍ଯ୍ୟନ୍ତ ନିଜକୁ ବିସ୍ତାର କରିଛନ୍ତି। ବାଲିରେ ଅନୁଷ୍ଠିତ ହେବାକୁ ଥିବା ଉତ୍ସବରେ ସେ କୋରାପୁଟର ପ୍ରସିଦ୍ଧ କୋଟପାଡ଼ ହସ୍ତତନ୍ତ ସାମଗ୍ରୀକୁ ପ୍ରଦର୍ଶିତ କରିବେ।

ମୟୂରଭଞ୍ଜର ସବାଇ ଘାସ ଶିଳ୍ପର ବିଶ୍ୱ ଯାତ୍ରା
ମୟୂରଭଞ୍ଜ ଜିଲ୍ଲା ଅନ୍ଧାରିଶୋଳ ଗ୍ରାମର ସୁମିତ୍ରା ବାରିକ ସବାଇ ଘାସରୁ ସୁନ୍ଦର ଘରକରଣା ସାମଗ୍ରୀ ପ୍ରସ୍ତୁତ କରି ଏକ ବଡ଼ ସଫଳତା ପାଇଛନ୍ତି। ଓର୍ମାସ (ORMAS) ଠାରୁ ତାଲିମ ପାଇ ସେ ସୋଫା ସେଟ୍, ଡାଇନିଂ ଟେବୁଲ୍ ଏବଂ ଅଳଙ୍କାର ପରି ବିଭିନ୍ନ ସାମଗ୍ରୀ ତିଆରି କରୁଛନ୍ତି। ତାଙ୍କ ଦ୍ୱାରା ପ୍ରସ୍ତୁତ ସାମଗ୍ରୀ ଏବେ ବର୍ଷକୁ ୧୫ ରୁ ୨୦ ଲକ୍ଷ ଟଙ୍କାର ବ୍ୟବସାୟ କରୁଛି। ଏହି ଆୟରେ ସେ ନିଜ ପିଲାଙ୍କୁ ଉଚ୍ଚଶିକ୍ଷା ଦେବା ସହ ନୂଆ ଘର ମଧ୍ୟ ତିଆରି କରିଛନ୍ତି। ଏହି ତିନି ମହିଳାଙ୍କ ଯାତ୍ରା ପ୍ରମାଣିତ କରିଛି ଯେ ସରକାରୀ ପ୍ରୋତ୍ସାହନ ଏବଂ ଦୃଢ଼ ଇଚ୍ଛାଶକ୍ତି ଥିଲେ ଓଡ଼ିଶାର ଗ୍ରାମାଞ୍ଚଳର ମହିଳାମାନେ ମଧ୍ୟ ବିଶ୍ୱ ସ୍ତରରେ ବ୍ୟବସାୟିକ ନେତୃତ୍ୱ ନେଇପାରିବେ।