ଲିଭର୍ ସିରୋସିସ୍ ସହ ଲଢ଼ି ଶେଷରେ ନିରବି ଗଲେ ଓଡ଼ିଆ ଚଳଚ୍ଚିତ୍ର ଜଗତର ମହାନାୟକ ଭଞ୍ଜମାଟିର କୁନିଆ ଦାଦା (ଉତ୍ତମ ମହାନ୍ତି)। ବାରିପଦା ସହରରୁ ଅଭିନୟର ଖଡ଼ିଛୁଆଁ ହୋଇଥିଲା ତାଙ୍କର। ବାରିପଦାରେ କଟିଥିଲା ପିଲାଦିନ ଓ ଆଦ୍ୟ ଯୁବାବସ୍ଥା। ହେଲେ ଆଜି ସେ ନାହାନ୍ତି ବୋଲି ଗୁମୁରି କାନ୍ଦୁଛି ବାରିପଦା ମାଟି। ସହରର ଯେଉଁ ଗଳିରେ ଘର, ଯେଉଁଠି କଟିଥିଲା ପିଲାଦିନ; ସେଠି ଆଜି ଛାଇଯାଇଛି ନିରବତା। ପିଲାବେଳର ସାଙ୍ଗସାଥୀ, ପରିବାର, ସମ୍ପର୍କୀୟ ସମସ୍ତ ଆଖିରେ କୁନିଆଙ୍କ ପାଇଁ ଲୁହ। କାରଣ ଉତ୍ତମ ଆଉ ଫେରିବେନି…ସେ କେବଳ ସିନେମାରେ ନୁହେଁ ବରଂ ଫ୍ୟାନ୍ସମାନଙ୍କ ମନରେ ମଧ୍ୟ ରାଜ୍ କରୁଥିଲେ । ଲୋକମାନେ ମଧ୍ୟ ଅଭିନେତା ଉତ୍ତମ ମହାନ୍ତିଙ୍କ ଫିଲ୍ମକୁ ଦେଖିବାକୁ ବହୁତ୍ ଭଲ ପାଉଥିଲେ । ହେଲେ ଦୁଖଃର ବିଷୟ ଯେ ଅନେକ ସୁପରହିଟ୍ ଚଳଚ୍ଚିତ୍ରରେ ନିଖୁଣ ଅଭିନୟ କରି ଦର୍ଶକଙ୍କୁ ମନୋରଞ୍ଜନ କରୁଥିବା ଏହି ମହାନ୍ ନାୟକଙ୍କ ଜୀବନ ଦୀପ ଆଜି ଲିଭିଯାଇଛି ।
ସେ ଥିଲେ ଓଲିଉଡ଼ର ‘ଦଣ୍ଡାବାଳୁଙ୍ଗା’, ‘ସରପଞ୍ଚ ବାବୁ ’। ତାଙ୍କ ନାମ ଖାଲି ଉତ୍ତମ ମହାନ୍ତି ନଥିଲା, ତାଙ୍କ ବ୍ୟକ୍ତିତ୍ବ ମଧ୍ୟ ଉତ୍ତମ ଥିଲା ଓ ତାଙ୍କ ଅଭିନିତ ଫିଲ୍ମ ସର୍ବୋତ୍ତମ ଥିଲା । ୭୦ ଦଶକରୁ ଦର୍ଶକଙ୍କ ମନରେ ରାଜ୍ କରିଆସୁଥିଲେ ଓଡ଼ିଆ ଚଳଚ୍ଚିତ୍ର ଜଗତର ଭେଟେରାନ ଅଭିନେତା ଉତ୍ତମ ମହାନ୍ତି । ସେ ସମୟରେ ସେ ଥିଲେ ରୋମାଣ୍ଟିକ ହିରୋ ।୨୩ ଡିସେମ୍ୱର ୧୯୫୮ ରେ ମୟୂରଭଞ୍ଜର ବାରିପଦାରେ ଜନ୍ମଗ୍ରହଣ କରିଥିଲେ ଉତ୍ତମ ମହାନ୍ତି । ଅଭିନେତା ଉତ୍ତମ ମହାନ୍ତିଙ୍କର ଫିଲ୍ମ ପାଇଁ ଆଗ୍ରହ ନଥିଲା । ଅଭିମାନରେ ଅଭିନୟ କରିବା ପରେ କିଛିଦିନ ଅଭିନୟରୁ ଦୂରେଇଯାଇଥିଲେ । କିନ୍ତୁ ପରେ ଜିଦରେ ଫେରିଆସିଥିଲେ । ପ୍ରଥମ ଫିଲ୍ମର ସୁଟିଂ ପରେ ସେ ପଢିବା ପାଇଁ କୋଲକାତା ଯାଇଥିଲେ । ସେଠାରେ ଥିବାବେଳେ ଫିଲ୍ମ ନିର୍ଦ୍ଦେଶକ ଧୀର ବିଶ୍ବାଳଙ୍କଠାରୁ ଫିଲ୍ମ ’ଗୌରୀ’ ପାଇଁ ଅଫର ମିଳିଥିଲା । ହେଲେ କ୍ରମେ ଏହି ଫିଲ୍ମ ପାଇଁ ତାଙ୍କ ବଦଳରେ ପ୍ରଶାନ୍ତ ନନ୍ଦଙ୍କୁ ନିଆଯାଇଥିଲା । ଯାହା ଉତ୍ତମଙ୍କୁ ଭାରି ଖରାପ ଲାଗିଥିଲା । ତେଣୁ ସେ ଫିଲ୍ମରେ ନିଜର ସ୍ଥାନ ଜମାଇବାକୁ ଜିଦରେ ନିଷ୍ପତ୍ତି ନେଇଥିଲେ। ଏହାପରେ ‘ଅଭିମାନ’ ଚଳଚ୍ଚିତ୍ରରୁ ଆରମ୍ଭ ହୁଏ ତାଙ୍କ ଫିଲ୍ମ କ୍ୟାରିୟର । ଦୀର୍ଘ ୪୮ ବର୍ଷ ଧରି ସେ ସିନେ ଇଣ୍ଡଷ୍ଟ୍ରିରେ ରାଜ୍ କରିଥିଲେ ।
