କରୋନା ମହାମାରୀ ସମସ୍ତଙ୍କ ଜୀବନ ଓ ଜୀବିକାକୁ ପ୍ରଭାବିତ କରିଛି । ଲକଡାଉନ ଯୋଗୁଁ ଆମକୁ ମାସ ମାସ ଧରି ଘରର ଚାରିକାନ୍ଥ ଭିତରେ ରହିବାକୁ ପଡ଼ୁଛି । ଘରେ ରହି ରହି ଖବରକାଗଜ, ଟେଲିଭିଜନ ଓ ଇଣ୍ଟରନେଟ ମାଧ୍ୟମରେ କରୋନା ସଂପର୍କିତ ଖବର ପଢିବା ବା ଦେଖିବା ଛଡ଼ା ଆଉ ବିଶେଷ କିଛି କାମ ନାହିଁ । କାହାକୁ ଫୋନ ଲଗାଇଲେ ମଧ୍ୟ ସେଥିରେ କରୋନା କଥା କହୁଛି । ମାସ ମାସ ଧରି ଲକଡାଉନରେ ରହିବା ଦ୍ୱାରା ଲୋକମାନଙ୍କ ମାନସିକ ସ୍ଥିତି ପ୍ରଭାବିତ ହେଉଛି । ମାନସିକ ଚାପରେ ରହି ଲୋକମାନେ ନିଶାଦ୍ରବ୍ୟ ମଧ୍ୟ ସେବନ କରିବା ଅସ୍ୱାଭାବିକ ନୁହେଁ । ଏଣୁ ସମୟ ଥାଉ ଥାଉ ଏହାର ସମାଧାନ ନକଲେ ତାହା ଧୀରେ ଧୀରେ ଅବସାଦ ବା ଡିପ୍ରେସନ ଆଡ଼କୁ ଯାଇପାରେ ବୋଲି ବିଶେଷଜ୍ଞମାନେ କହୁଛନ୍ତି ।
ଏଣୁ ଏହି ସ୍ଥିତିରୁ ମୁକୁଳିବା ପାଇଁ ଲୋକମାନଙ୍କୁ ନିଜ ଜୀବନ ଶୈଳୀରେ ଟିକିଏ ସକାରାତ୍ମକ ପରିବର୍ତ୍ତନ ଆଣିବାକୁ ହେବ । ଏକ ସ୍ୱତନ୍ତ୍ର ଯୋଜନା କରି ଏହା କରାଯାଇପାରେ । ତେବେ ବୟସ ଅନୁସାରେ ଏହି ଯୋଜନା ଭିନ୍ନ ହୋଇପାରେ ।
ଛୋଟ ପିଲା : ଛୋଟ ପିଲାମାନେ ମଧ୍ୟ ଘରେ ରହି ରହି ବିରକ୍ତ ହୋଇ ଯାଆନ୍ତି । ଏଣୁ ଅଭିଭାବକମାନେ ଧୈର୍ଯ୍ୟର ସହ ସେମାନଙ୍କ ସହ ବ୍ୟବହାର କରିବା ଉଚିତ । ଘରେ ସେମାନଙ୍କ ସହ କିଛି ଇଣ୍ଡୋର ଗେମ ଖେଳାଯାଇପାରେ, ଯୋଗ କରାଯାଇପାରେ, ବଗିଚା କାମ, ପେଣ୍ଟିଂ କରାଯାଇପାରେ । ଏପରି ହେଲେ ସେମାନେ ଖୁସି ରହିବେ ଓ ମାନସିକ ଚାପ କମ ରହିବ ।
କିଶୋର : ଲକଡାଉନ ଯୋଗୁଁ ସ୍କୁଲ କଲେଜ ବନ୍ଦ ରହିଛି ଓ ବିଭିନ୍ନ ପରୀକ୍ଷା ମଧ୍ୟ ବାତିଲ ହୋଇଛି । ଏହା ଫଳରେ କିଶୋରମାନଙ୍କ ମଧ୍ୟରେ ନିଜ କ୍ୟାରିୟରକୁ ନେଇ ଚିନ୍ତା ଦେଖାଦେଉଛି । ଏଣୁ ସେମାନଙ୍କ ସହ ଏ ବିଷୟରେ କଥାବାର୍ତ୍ତା କରି ସେମାନଙ୍କୁ ଉଚିତ ପରାମର୍ଶ ଦିଅନ୍ତୁ । ଏହା ଛଡ଼ା ବିଭିନ୍ନ ଅନଲାଇନ କୋର୍ସରେ ନାମ ଲେଖାଇ ସେମାନଙ୍କ ଦକ୍ଷତା ବୃଦ୍ଧି କରାଯାଇପାରେ ।
ବୟସ୍କ ବ୍ୟକ୍ତି : କରୋନା ଯୋଗୁଁ ସବୁଠାରୁ ଅଧିକ ପ୍ରଭାବିତ ହେଉଛନ୍ତି ବୟସ୍କ ବ୍ୟକ୍ତି । କାରଣ ଏହା ସେମାନଙ୍କୁ ଅଧିକ ସଂକ୍ରମିତ କରୁଛି । ଏହି କାରଣରୁ କରୋନା ସେମାନଙ୍କ ମାନସିକ ଚାପକୁ ମଧ୍ୟ ବଢାଇଦେଇଛି । ଏଣୁ ଘରେ ଥିବା ବୟସ୍କ ବ୍ୟକ୍ତିଙ୍କ ସ୍ୱତନ୍ତ୍ର ଧ୍ୟାନ ରଖାଯିବା ଉଚିତ । ସେମାନେ ଯେପରି ଏକୁଟିଆ ଅନୁଭବ ନକରନ୍ତି ସେଥିପ୍ରତି ଗୁରୁତ୍ୱ ଦିଆଯିବା ଉଚିତ ।
ମୋଟାମୋଟି ଭାବେ ସବୁ ବୟସର ବ୍ୟକ୍ତି ଚିନ୍ତା ମୁକ୍ତ ରହିବା ସହ ନିୟମିତ ବ୍ୟାୟାମ କରିବା, ସୁଷମ ଖାଦ୍ୟ ଖାଇବା, ଠିକ ସମୟରେ ଶୋଇବା ଦ୍ୱାରା ନିଜର ମାନସିକ ଚାପକୁ ନିୟନ୍ତ୍ରଣରେ ରଖିପାରିବେ ।
