International Womens Day : ରାଜ୍ୟସଭା ଯିବେ ସୁଧା ମୁର୍ତ୍ତୀ, ସରଳତା ଏବଂ ଉତ୍ସର୍ଗୀକୃତତାର ଏକ ନିଆରା ଉଦାହରଣ
ନୂଆଦିଲ୍ଲୀ : ଦେଶର ପ୍ରଥମ ମହିଳା ଇଞ୍ଜିନିୟର ହେବା ଠାରୁ ଆରମ୍ଭ କରି ଇନଫୋସିସ୍ ଭଳି ଏକ କମ୍ପାନୀ ପ୍ରତିଷ୍ଠା କରିଥିବା ସୁଧା ମୁର୍ତ୍ତୀ ମଧ୍ୟ ରାଜ୍ୟସଭାକୁ ଯାଉଛନ୍ତି। ରାଷ୍ଟ୍ରପତି ଦ୍ରୌପଦୀ ମୁର୍ମୁ ସାମାଜିକ କର୍ମୀ ତଥା ଲେଖକ ସୁଧା ମୁର୍ତ୍ତୀଙ୍କୁ ରାଜ୍ୟସଭାରେ ମନୋନୀତ କରିଛନ୍ତି। ବିଭିନ୍ନ କ୍ଷେତ୍ରରେ ତାଙ୍କର ଅବଦାନକୁ ପ୍ରଶଂସା କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କୁ ସ୍ୱାଗତ କରିଛନ୍ତି। ଆଜି ଆନ୍ତର୍ଜାତୀୟ ମହିଳା ଦିବସ ଅବସରରେ ବିଭିନ୍ନ ମହଲରୁ ସୁଧା ମୂର୍ତ୍ତୀଙ୍କୁ ପ୍ରଂଶସା ଏବଂ ଶୁଭେଚ୍ଛାର ସୁଅ ଛୁଟିଛି।
ଏକ ପୋଷ୍ଟରେ ସୁଧା ମୁର୍ତ୍ତୀଙ୍କୁ ପ୍ରଶଂସା କରି ମୋଦୀ କହିଛନ୍ତି – ଉପର ଗୃହରେ ତାଙ୍କର ନାମ ‘ମହିଳା ଶକ୍ତି’ର ଏକ ଦୃଢ ପ୍ରମାଣ, ଯାହାକି ଦେଶର ଗରିବାରେ ମହିଳାଙ୍କ ଶକ୍ତି ଏବଂ ଦକ୍ଷତାର ଏକ ଉଦାହରଣ। ସେ କହିଛନ୍ତି, “ମୁଁ ଖୁସି ଯେ ଭାରତର ରାଷ୍ଟ୍ରପତି ସୁଧା ମୁର୍ତ୍ତୀଙ୍କୁ ରାଜ୍ୟସଭା ପାଇଁ ମନୋନୀତ କରିଛନ୍ତି। ସାମାଜିକ କାର୍ଯ୍ୟ ଏବଂ ଶିକ୍ଷା ସମେତ ବିଭିନ୍ନ କ୍ଷେତ୍ରରେ ସୁଧା ଜୀଙ୍କର ଅବଦାନ ଅତୁଳନୀୟ ଏବଂ ପ୍ରେରଣାଦାୟକ ଅଟେ ।
ଇନଫୋସିସ୍ ସହ-ପ୍ରତିଷ୍ଠାତା ଏନ.ଆର. ନାରାୟଣ ମୁର୍ତ୍ତୀଙ୍କ ପତ୍ନୀ ମଧ୍ୟ ସୁଧା ମୂର୍ତ୍ତୀ ‘ମୂର୍ତ୍ତୀ ଟ୍ରଷ୍ଟ’ର ଚେୟାରମ୍ୟାନ୍ ତଥା ଅନେକ ପୁସ୍ତକ ଲେଖିଛନ୍ତି। ସଂସଦର ଉପର ଗୃହରେ ତାଙ୍କର ନାମାଙ୍କନ ଅନ୍ତର୍ଜାତୀୟ ମହିଳା ଦିବସ ଦିନ ଆସିଛି। ପରିବର୍ତ୍ତନ ଏବଂ ଶିକ୍ଷା ଆଣିବାକୁ ତାଙ୍କର ଇଚ୍ଛା ଏକ ପ୍ରମୁଖ ଭୂମିକା ଗ୍ରହଣ କରିଛି। ଇନଫୋସିସ୍ ର ଅଧ୍ୟକ୍ଷ ହେବା ସହିତ ସେ ଜଣେ ଲେଖକ ଏବଂ ସାମାଜିକ କର୍ମୀ ମଧ୍ୟ । ୨୦୦୬ ମସିହାରେ ତାଙ୍କୁ ପଦ୍ମଶ୍ରୀ ପୁରସ୍କାରରେ ସମ୍ମାନିତ କରାଯାଇଥିଲା। ସେ ଏକ ସାକ୍ଷାତକାରରେ କହିଥିଲେ ଯେ ତାଙ୍କୁ ଇଞ୍ଜିନିୟରିଂ ଅଧ୍ୟୟନ ପାଇଁ ବହୁତ ସଂର୍ଘଷ କରିବାକୁ ପଡିଥିଲା।
ତାଙ୍କ ବାସ୍ତବ ଜୀବନରେ “ସରଳ ଜୀବନ, ଉଚ୍ଚ ଚିନ୍ତାଧାରା” ର ନୀତି ଗ୍ରହଣ କରିଥିବା ସୁଧା ମୁର୍ତ୍ତୀ ଜଣେ ଆଇଟି ଶିଳ୍ପପତି ତଥା ଇନଫୋସିସ୍ ପ୍ରତିଷ୍ଠାତା ଏନ.ଆର ନାରାୟଣ ମୁର୍ତ୍ତୀଙ୍କ ପତ୍ନୀ ତଥା ପ୍ରେରଣାଦାୟକ ମହିଳା। ସେ ନିଜର କଷ୍ଟ ଉପାର୍ଜିତ ଅର୍ଥକୁ ନାରାୟଣ ମୁର୍ତ୍ତୀଙ୍କ ବ୍ୟବସାୟ ଧାରାରେ ବିନିଯୋଗ କରିବାକୁ ନିଷ୍ପତ୍ତି ନେଇଥିଲେ ଯେଉଁ ସମୟରେ ଭାରତର ଆଇଟି କ୍ଷେତ୍ର ଏହାର ପ୍ରାରମ୍ଭିକ ପର୍ଯ୍ୟାୟରେ ଥିଲା। ତାଙ୍କ ହେତୁ ହିଁ ଇନଫୋସିସ୍ କମ୍ପାନୀ ଆରମ୍ଭ ହୋଇଥିଲା |
ସୁଧା ମୁର୍ତ୍ତୀଙ୍କ ଦୁଇଟି ସନ୍ତାନ ଅଛନ୍ତି, ଝିଅ ଅକ୍ଷତା ମୁର୍ତ୍ତୀ ଏବଂ ପୁଅ ରୋହନ ମୁର୍ତ୍ତୀ । ଅକ୍ଷତା ନାରାୟଣ ବ୍ରିଟେନର ପ୍ରଧାନମନ୍ତ୍ରୀଙ୍କ ପତ୍ନୀ ତଥା ଜଣେ ଫ୍ୟାଶନ ଡିଜାଇନର୍। ରୋହନ ମୁର୍ତ୍ତୀ ‘ମୁର୍ତ୍ତ’ କ୍ଲାସିକାଲ୍ ଲାଇବ୍ରେରୀ ଅଫ୍ ଇଣ୍ଡିଆ ଏବଂ ଡିଜିଟାଲ୍ ଟ୍ରାନ୍ସଫର୍ମେସନ୍ ଷ୍ଟାର୍ଟଅପ୍ ସୋରୋକୋର ପ୍ରତିଷ୍ଠାତା । ସେ ବିଶ୍ୱାସ କରନ୍ତି ଯେ କୌଣସି ସାମାଜିକ ପରିବର୍ତ୍ତନ ମାନସିକତାର ପରିବର୍ତ୍ତନରୁ ଆସିଥାଏ । ମାନସିକ ପରିବର୍ତ୍ତନ ପାଇଁ ସଚେତନତା ଆଣିବାକୁ ପଡିବ। ସଚେତନତା ପାଇଁ ଶିକ୍ଷା ଆବଶ୍ୟକ।